Hos 14 | KYC | STEP | Isaraele wambu dupwa nakamana Kamongo Anatu karamo dokona kapu kyuo pupwape. Nakamana koo dupwame nakama lukumakapala pao palimi kandape.

Hosea 14

Osiame Isaraele Wambu Dupwa Poraiyuo Piso Siya

1 Isaraele wambu dupwa nakamana Kamongo Anatu karamo dokona kapu kyuo pupwape. Nakamana koo dupwame nakama lukumakapala pao palimi kandape. 2 Kamongo karamo dokona kapu kyuo papala mena pyao kiso maingi dopale ingyuo penale ateŋa dapa lao lalapape. Namwana koo dupwa nyuo kame sakapala ateŋa letamano doko soo nyepe. Soo nyerene dokopa namwa lalu lao leyamanoli pyuo emba lakandarama. 3 Asiria wambu dupwame namwa nyisa naraminyipa dee yanda pingi mena ose dupwame kyawa minya naramiko. Namwame namwana isa kanapeme wasisi dupwa nakama namwana anatuŋu lao laa naramako. O Kamongo, embame wambu mendalimi nyisara ingya napyamo karaminyi dupwa sakame kumuo nyiso karenge.

Kamongome Isaraele Wambu Dupwa Lete Karenge Renge Enenge Doko Nyerami Lao Lalu Lao Leya

4 Kamongome dopa leya.

Nambana wambu dupwa namba range keta lanyuo eparo.
Namba nakama kando imbwa nalu nao naro dokona
nambana mona dokona piso mona retaro.
5 Nambame yuu yando oo lasinya apu epe pau lanyi pyambungi doko suu pyao
Isaraele wambu pipya kararo.
Dopa pirunu dokopa yuu Lepanone isa andenge dopale ingyuo
poraiyuo pingi pyao karo
isa jingi kalya pingi pakona pinyi peyo lokwasingi dopale ingyuo ando karo pirami.
6 Nakama enenge ingyuo pingi pyao
olipi isa au pyuo andenge dopale ingyuo au pyuo ando kararami.
Dopa pyuo nakama yuu Lepanone dokona isa kingi sita lengende
kyaa keyange pilyamo karenge dopale ingyuo ando kararami.
7 Dopako pyuo nambame nakama kyawa minyuo kararono kararami.
Nakama ee menya menya lao andenge dopale ingyuo ando
isa girapo ee ando jingi lyuo kakana pingi dopale ingyuo kararami.
Yuu Lepanone dokona ipwa waene ama keyange wasingi lao wambu peparaeme singi doko suu pyao nakamana kingi doko uu lepa lepa paramo kararami.
8 Isaraele wambu dupwa nakamana isa kanapeme wasisi dupwana lao mende piraminde daa.
Nambame nakamana ateŋa dupwana isingi yano pyakao nakama rapu pyuo piru.
Pipala nambame isa yoko kyako ando karalu karenge dopale ingyuo nakama keta sinyinyi peyakaro.
Namba nakamana bange elyape dupwana ipwa ingyuo guu lao karakalyo.

Pii Lao Lumwa Pyuo Letamo Doko

9 Wambu lapo mona angi palenge dupwame pii pyasi palamo dupwa soo nyuo dokopa mona andarena soo mandenale. Kamongo banya kata dupwa rolaena renge palenge dokona wambu yulu rolae pingi dupwa rolaena renge palenge dokona ingyuo karenge. Dopa piramopape sili see nale lao koo pingi dupwa lukumapala pao palenge.